راشد الماجد – هذا المختصر

قال الذي ماله على الدنيا خصيم الا المكيدة والخيانة و الغدر

يمشي على مبداه والله به عليم و اللى حكى ياما صهل ولا هدر

والناس في ذا الوقت محمود و ذميم و الرابح اللي يتقي شر البشر

الله يقطع كل مختال اثيم يقطع نبا اللي كل مايسند عثر

يا اهل قطر لاهب ذعذاع النسيم عسى نسايم داركم ورد وزهر

أحبكم من قلب والله العظيم لو كان ما به بيننا درب وجسر

قبايل و تقديركم عند الحشيم يجري بصدره مثل ما يجري النهر

و اكرام روس وما خلق فيكم لئيم و حرار راي و عندكم علم و خبر

وانا ولدكم وان حكى فيني غشيم من قدركم نسيت كل اللي بدر

انا مسامحكم وانا الحر العديم اللي ما يطعن ف الكتوف و ف الظهر

لكن سماكم قد لها عتمه و غيم و احيان عقب الغيم ما يأتي مطر

تكاتفوا و اشروا رضى الرب الرحيم و ابروا ذممكم قبل ناقوس الخطر

ماني بقايل لا توالون لتميم ولاني بقايل لا توالون لقطر

لكن حثوهم على النهج القويم و قولوا لهم ترى الخطا عقبة عذر

قولوا لهم حنا على العهد القديم عمر اللحم و الدم ما راحت هدر

عنا مناهجنا الصراط المستقيم من شذ عنا طاح في ويل وصقر

ولانبي منهم سوى الدرب السليم و تجنيبهم للمنعطف والمنحدر

يقاطعون إيران مقباس الجحيم اللي خذوها بالأيادي و الصدر

يقدرون الجار من شعب وزعيم على النقا في سر ولا في جهر

وان كان طاعوكم لحقتوا كل تيم والله وقاكم من صواديف الدهر

وان كان ما طاعوا يجاوبني الفهيم وش فايدة هذا الولا ولا الفخر

لا صار صاحبكم على دربه يهيم بالله عليكم وين يلقى له قدر

اصبح عدوه من بعد حقده نديم حتى خطاه يقال له وجهة نظر

واصبح صديقه من بعد حبه غريم ما يدري انه لا بدا اللازم شهر

شوروا عليه يجنب بليس الرجيم اللي دروبه من بدايتها وعر

واهم شي الدرب لايصبح وخيم و اهم شي الحق ما دامه ظهر

هذا الكلام اللي يسمى ف الصميم من خالفه ياخذ له دروس وعبر

وان قيل وين الحل ف الراس الحكيم في عاصمة سلمان «هذا المختصر»

0 ردود

اترك رداً

Want to join the discussion?
Feel free to contribute!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *